Tungkol sa Manunulat

My photo
Premyadong manunulat sa Kinaray-a, Filipino, Hiligaynon, at Ingles si JOHN IREMIL E. TEODORO na tubong-San Jose de Buenavista, Antique. Ilang beses nang nanalo ng Carlos Palanca Memorial Awards for Literature at ng National Book Award mula sa Manila Critics Circle at National Book Development Board. Associate Professor siya ng wikang Filipino, literatura, at malikhaing pagsulat sa College of Arts and Sciences ng Miriam College, Lungsod Quezon. Nagtapos siya ng M.F.A. Creative Writing sa De La Salle University-Manila kung saan siya nag-aaral ng Ph.D. in Literature sa kasalukuyan. Kilala rin siyang kritiko ng Literaturang Hiligaynon. Nakatira siya ngayon sa kaniyang maliit ngunit makulay na bahay sa Rosario, Lungsod Pasig.

Friday, March 25, 2011

Sa Lalaking Naglalako na ng Bookshelf Ala-sais ng Umaga sa Manggahan, Pasig


Talo ang eksena ni Sharon Cuneta
Na pasan-pasan ang pulubing ina
Sa Pasan Ko ang Daigdig ni Lino Brocka,
O di kaya ang pagong na pasan-pasan ang bahay
Sa kuwentong sinulat at ginuhit ni Jose Rizal.
Maibebenta mo kaya ‘yang estante ng mga libro
Bago magtanghali o bago magtakip-silim?
O baka madaling-araw bukas ilalako mo uli ‘yan
Na para bang araw-araw ay Biyernes Santo.
Naiisip ko tuloy ang mga walang kuwentang libro
Na sinusulat naming mga makata
Dito sa loob at labas ng bayan nating sawi
Dahil marami ang nag-iisip at nag-aakala
Na ang tula ay isang bungkos lamang ng mga salita.
Patawad, kapatid. Lalo naming pinabibigat
Ang pasan-pasan mong Krus!


-J.I.E. TEODORO
 23 Marso 2011 Huwebes
 6:40 n.u. Lungsod Pasig
Posted by at

No comments:

Post a Comment

Note: Only a member of this blog may post a comment.

Subscribe to: Post Comments (Atom)